Энэ хичээл нь OpenBot-ийн AI ажилтныг өдөр бүр хариуцах хүнд зориулагдсан. Дуусахад та мэдлэгийн санд мэдээлэл нэмж, бот хариулж чадаагүй асуултыг нөхөж, өөрчлөлтөө туршилтын чатаар шалгаж, суваг бүрт AI-ийн горимыг зөв сонгож чадна.

AI ажилтны бүх тохиргоо нэг газар байдаг: хажуугийн цэсний AI дүрс, дотор нь AI ажилтан. Тэнд зургаан хэсэг бий: Сургах, Зан төлөв, Чадвар, Турших, Ажиллуулах, Хянах.

Хичээлийн дараалал нь бодит ажлын дараалалтай ижил: эхлээд сургана, дараа нь туршина, эцэст нь асаана. Энэ дарааллыг баримталбал бот харилцагчид буруу мэдээлэл хэлэх эрсдэл хамгийн бага.

AI ажилтан интернэтээс юу ч хайхгүй. Харилцагчийн асуултад хариулахдаа зөвхөн гурван эх сурвалжийг ашиглана: мэдлэгийн сан, бараа, бизнесийн мэдээлэл.

Энэ гурав огт хоосон бол AI-г асаах унтраалга идэвхгүй харагдана: бот хариулах зүйлгүй.

Хэрэв харилцагч эдгээрт байхгүй зүйл асуувал бот "энэ миний хариулах хүрээнээс гадна" гэх утгатай хариулж, оператортой холбогдохыг санал болгоно. Энэ нь алдаа биш: бот худлаа зохиохоос хамгаалж байна. Ийм асуулт нь дараа нь Цоорхой хэсэгт цуглардаг (энэ хичээлийн Сургах хэсэгт үзнэ).

Хажуугийн цэсэнд AI дүрс дээр дарахад доор нь эдгээр зургаан хэсэг жагсана. Зарим нь дэд хэсэгтэй: Сургах доор Каталог, Турших доор Тохируулгын чат, Туршилтууд, Шалгалтын асуултууд.

AI ажилтан руу ороход шууд Сургах хэсэг нээгдэнэ.

• Сургах: ботод мэдлэг өгөх газар.
• Зан төлөв: бот хэрхэн ярих (Ерөнхий, Дуу хоолой, Дүрэм, Зорилго).
• Чадвар: бот юу хийж чадахыг бүлгээр харуулна (Харилцаа, Мэдлэг, Бараа, Захиалга, Цаг захиалга). Хаалттай бол шалтгааныг бичнэ, жишээ нь "Бараа бүртгээгүй байна". Бэлэн хариулт, карусель тохиргоо ч энд.
• Турших: бодит харилцагчид харагдахгүй туршилтын чат.
• Ажиллуулах: AI-г асаах, унтраах цорын ганц газар.
• Хянах: AI юу хийснийг харах (Харилцагчид хариулсан, Оператор руу шилжүүлсэн, Захиалга үүсгэсэн, Хуучин үнэ илэрсэн гэх мэт).

AI ажилтан, Сургах хуудсанд баруун дээд буланд цэнхэр Нэмэх товч байна. Дарахад "Мэдлэг нэмэх" маягт нээгдэнэ.

1. Ангилал: Түгээмэл асуулт, Бүтээгдэхүүн, Бизнес бодлого (ажлын цаг, хүргэлт, буцаалт), Ерөнхий.
2. Гарчиг: харилцагчийн асуух хэлбэрээр бичнэ, жишээ нь "Хүргэлт хэдэн хоногт ирэх вэ?".
3. Агуулга: товч, тодорхой 3-5 өгүүлбэр. Дэлгэрэнгүй бичих тусам AI нарийн хариулна.
4. Доод талын Нэмэх товч. Баталгаажуулах цонх гарна.

Эхлээд хамгийн их асуудаг зүйлсээс эхэл: хүргэлт, төлбөр, буцаалт, баталгаа, ажлын цаг, байршил.

Нэмэх товчны хажуугийн ... цэсэнд бусад арга: AI-р үүсгэх, PDF/DOCX файл, CSV импорт, мөн бүх санг Экспорт хийх.

Шинэ бичлэг эхлээд "Бэлтгэж байна" төлөвтэй, ихэвчлэн хурдан, ховор тохиолдолд 24 цаг хүртэл хугацаанд "Хайлтад бэлэн" болно. Бичлэгийг түр хэрэглэхгүй бол устгахын оронд унтраана.

Сургах доорх Каталог нь барааны зургийн цуглуулга (Visual каталог). Google Drive-аас мэдлэг татах боломж тун удахгүй.

Сургах хуудасны дээд хэсэгт Цоорхой гэсэн жагсаалт байна. Энд харилцагчид асуусан боловч бот сайн хариулж чадаагүй асуултууд цуглардаг, хэдэн удаа асуусан тоотойгоо.

Төрлүүд: - Хариулж чадаагүй: таны мэдлэгийн санд энэ талаар юу ч алга. - Мэдлэг байсаар ашиглаагүй: тохирох бичлэг байсан ч бот түүнийг олоогүй. Тухайн бичлэгийн гарчгийг харилцагчийн хэлдэг үгээр засахад ихэвчлэн шийдэгдэнэ. - Эрэлт: олон хүн асуусан сэдэв.

Хариулт бичих дарж зөв хариултыг бичээд Мэдлэгийн санд нэмэх дарвал тэр нь шууд шинэ бичлэг болно. Бот дараагийн удаа түүгээр хариулна. Хамаагүй асуултыг Нуух товчоор жагсаалтаас хасна.

Жагсаалтын доор гурван тоо: Идэвхтэй бичлэг, Тэмдэгт, Хайлтад бэлэн биш.

Долоо хоногт нэг удаа Цоорхойг нөхөх нь ботыг сайжруулах хамгийн хурдан арга.

Тохиргоо, Бизнес мэдээлэл, Бизнесийн мэдээлэл хуудас (гарчиг нь "Workspace-ийн мэдээлэл") гурван хэсэгтэй:

• Дээд хэсэгт Workspace-ийн нэр, Утас, Хаяг. Эдгээрийг Хадгалах товчоор хадгална. Бот өөрийгөө Workspace-ийн нэрээр танилцуулна.
• Ботын persona: бэлэн дүрүүд (жишээ нь SalesAI, BookingAI, ConsultAI, InfoAI). Дүр сонгоход түүнд тохирох тохиргоо автоматаар тавигдана.
• Бизнесийн профайл: дээрх дөрвөн карт. Энэ нь ботын ажлын хэлбэрийг шийднэ.

Persona ба профайлын карт нь дарсан даруй хадгалагдана, баталгаажуулах цонх гарна. Профайл солиход борлуулалтын горим, захиалгын урсгал зэрэг холбогдох тохиргоо хамт өөрчлөгддөг тул цонхны тайлбарыг уншаад батална.

Жишээ: "Номин гоо сайхан" салон бол Үйлчилгээ, цаг захиалга. Тэгвэл бот сагс санал болгохоо больж, цаг товлоход төвлөрнө.

Зан төлөв хэсэг дөрвөн дэд хэсэгтэй: Ерөнхий, Дуу хоолой, Дүрэм, Зорилго.

• Ерөнхий: угтах мессеж.
• Дуу хоолой: өнгө аяс, хэл.
• Дүрэм: системийн зааварчилгаа, дүрмүүд, хориглосон сэдвүүд, санал болгох хэллэгүүд, AI ботын нэр.
• Зорилго: ботын гол зорилго, чиглэл.

Амьд ботыг шууд өөрчлөхийн оронд Ноорогт хадгалах аргыг хэрэглэ. Ноорог нь бодит чатад нөлөөлөхгүй. Туршилтын чатад "Ноорог тест" асааж ноорог тохиргоогоор туршина. Сэтгэлд нийцвэл "Ноорог тохиргоо байна" гэсэн мөрний Publish товчоор амьд болгоно.

Өөрчлөлт бүрийн өмнөх төлөв автоматаар хадгалагдана. Ажиллуулах хуудасны ... цэс дэх Түүх-ээс өмнөх хувилбарыг сонгож Буцаах боломжтой.

AI ажилтан, Турших хуудсанд утасны дэлгэц шиг туршилтын чат бий. Та харилцагчийн оронд бичиж, бот яг бодит чатад хэрхэн хариулахыг харна.

Зүүн талд: - Платформ: Messenger эсвэл Instagram хэлбэрээр туршина. - Туршилтын асуулт: дарахад шууд илгээгдэх бэлэн асуултууд ("Сайн байна уу", "Юу зардаг вэ?", "Үнийн жагсаалт"). - Түүх, Яриа шинэчлэх: туршилтын яриаг цэвэрлэж, шинэ харилцагч шиг эхлүүлнэ.

Ботын хариулт бүрийн доор n эх сурвалж чип гарвал AI мэдлэгийн сангийн аль бичлэгийг ашигласныг харуулна. Буруу хариулт гарвал тэр бичлэгийг засна.

Туршилт нь сарын хариуны тоонд орохгүй (өдрийн хязгаартай). Бусад хуудаснаас ч баруун дээд Турших товчоор туршилтын чатыг хажуу самбараар нээж болно.

Анхаар: туршилтын чат хариулахын тулд Ажиллуулах дээрх мастер унтраалга асаалттай байх ёстой. Харилцагчид хараахан хариулуулахгүй бол сувгуудаа "Унтраах" эсвэл "Санал болгох" горимд байлгаад мастераа асаана (доор "Ботыг аюулгүй асаах" слайдад).

Турших, Шалгалтын асуултууд нь ботыг нэг дор олон асуултаар шалгах хэрэгсэл.

1. Нэмэх дарж Асуулт (жишээ нь "Хүргэлт хэдэн төгрөг вэ?") болон Сайн хариултын хүлээлт (жишээ нь "Хүргэлтийн үнийг хэлж, бүсээр ялгаатайг дурдана") бичнэ. Хүсвэл ангилал сонгоно.
2. Шалгах дарвал систем бүх идэвхтэй асуултыг ботоос асууж, хариу бүрийг Сайн, Хүлээн зөвшөөрөхүйц, Муу гэж үнэлнэ.
3. Хариултыг харах-аар ботын бодит хариуг уншина.

Ноорог тохиргоогоор сонголтоор нийтлэхээс өмнөх ноорог тохиргоог мөн шалгаж болно (ноорог байхгүй бол эхлээд Зан төлөв дээр ноорог хадгална).

Зөвлөмж: хамгийн чухал 10-20 асуултаа нэг удаа бичээд, том өөрчлөлт бүрийн дараа Шалгах дарж хуучин сайн хариултууд эвдрээгүй эсэхийг шалгаарай.

Ажиллуулах хуудасны Суваг бүрийн AI хэсэгт холбогдсон суваг бүр (Messenger, Instagram, Telegram, вэб виджет) нэг мөр бөгөөд баруун талд нь дөрвөн сонголт.

• Унтраах: энэ сувагт AI хариулахгүй. Мессеж Inbox-д ирсээр, та гараар хариулна.
• Санал болгох: AI хариугаа шууд илгээхгүй. Inbox-ийн яриан дотор "AI санал, илгээгдээгүй" карт гарна: Илгээх, Засах, Хаях. Сагс, захиалгын системийн мессеж автоматаар явсаар байна.
• Автомат: AI шууд хариулна.
• Гадаад бот: мессеж таны өөрийн бот руу (webhook) очиж, OpenBot-ийн AI хариулахгүй. Developer API боломжтой багцад л сонгогдоно, бусад үед товч идэвхгүй харагдана.

Сонголт хийгээгүй сувагт "Ерөнхий тохиргоог дагана" гэж бичигдэнэ: тэр суваг мастер унтраалгыг дагана.

Горим солих бүрд баталгаажуулах цонх гарна.

AI ажилтан, Ажиллуулах нь AI-г асаах, унтраах цорын ганц газар. Бусад хуудсанд унтраалга байхгүй.

Дээд картын AI автомат хариулт унтраалга нь мастер. Унтраалттай бол сувгийн горимоос үл хамааран бот хэнд ч хариулахгүй. Асаахад баталгаажуулах цонх гарна.

Доор нь Суваг бүрийн AI (өмнөх слайд).

Дор хаяж нэг суваг "Санал болгох" горимд байвал Шийдэгдээгүй AI саналын бодлого карт гарна: 24 цагийн дотор батлаагүй саналыг Хаях (анхдагч, харилцагч хариу авахгүй) эсвэл Автоматаар илгээх.

Хамгийн доор хоёр хураангуй карт: - Ажлын цаг: "Цагийн хуваарь засах" линк. Тохируулаагүй бол AI 24/7 хариулна. - Хүнд шилжүүлэх: ямар түлхүүр үгээр операторт шилжүүлэх. "Шилжүүлгийн дүрэм засах" линк. Түлхүүр үг байхгүй бол AI өөрөө шийднэ.

Олон хүн эхлээд мастер унтраалгыг асаагаад дараа нь туршдаг. Тэгвэл бот туршигдаагүй байхдаа бодит харилцагчид хариулж эхэлнэ. Зөв дараалал:

1. Ажиллуулах, Суваг бүрийн AI: суваг бүрийг Санал болгох болгоно. Бот хариугаа зөвхөн санал болгож, илгээхгүй.
2. Дээд талын AI автомат хариулт унтраалгыг асаана. Туршилтын чат зөвхөн мастер асаалттай үед хариулдаг.
3. Турших хуудсанд туршилтын чат болон шалгалтын асуултаар шалгана. Inbox-д ирж буй "AI санал" картуудыг уншина.
4. Саналууд зөв гарч байгаад итгэл төрвөл суваг бүрийг Автомат болгоно.

Эхний өдрүүдэд Inbox-ийн "AI санал" картыг заавал хараарай: 24 цагийн дотор шийдэхгүй бол бодлогын дагуу хаягдана эсвэл автоматаар илгээгдэнэ.

Шинэ workspace бүрт Зөвхөн миний оруулсан мэдээллээр хариулна гэсэн тохиргоо анхнаасаа асаалттай. Асаалттай үед бот мэдлэгийн сан, бараа, бизнесийн мэдээллийн хүрээнээс гадуурх асуултад (жишээ нь цаг агаар, өрсөлдөгч дэлгүүр, ерөнхий мэдлэг) хариулахгүй, оператортой холбогдохыг санал болгоно.

Энэ нь дэлгүүрийн нэрийн өмнөөс бот худлаа юм хэлэхээс хамгаалдаг тул ихэнх бизнест асаалттай байлгахыг зөвлөнө.

Тохиргоо нь Турших, Тохируулгын чат хуудасны зүүн талд байдаг. Тохируулгын чат бүх багцад нээгддэггүй тул тэр хуудас танд цоожтой харагдаж болно, энэ үед тохиргоо асаалттай хэвээр байна.

Бот хэрэгтэй асуултад "хүрээнээс гадна" гэж байвал унтраах биш, тэр мэдээллийг мэдлэгийн санд нэмнэ.

Багц бүр сарын AI хариуны хязгаартай. Free шатанд сард 100, бусад багцын хязгаарыг Багц хуудаснаас харна. Одоогийн хэрэглээ хажуугийн цэсний доод буланд харагдана.

Тоологдоно: - AI-ийн харилцагчид илгээсэн хариу. - "Санал болгох" горимд AI бичсэн санал бүр. Хэрэглээний тоолуурт илгээгдсэн нь л харагддаг ч хязгаарт хүрсэн эсэхийг шалгахдаа систем хаясан саналыг ч тооцно, учир нь AI тэр хариуг аль хэдийн бичсэн. - Flow (Автомат) дотор AI-аар хариу үүсгэдэг алхам.

Тоологдохгүй: - Туршилтын чат ба шалгалтын асуултууд (өдрийн хязгаартай). - Оператор гараар бичсэн хариу. - Загвараар автоматаар явдаг мессеж: төлбөрийн баримт, захиалгын баталгаа гэх мэт.

Хязгаар дүүрвэл AI зогсоно, гэхдээ мессеж Inbox-д ирсээр байна, та гараар хариулна. Нэмэлт хариуг Багц хуудаснаас авч болно.

Бот хариулахгүй үед шалгах дараалал: 1. Тохиргоо, Сувгууд: холболт амьд уу. 2. Багц: багц идэвхтэй, сарын хязгаар дүүрээгүй юу. 3. AI ажилтан, Ажиллуулах: мастер унтраалга асаалттай юу, тухайн суваг "Унтраах" биш үү. 4. Inbox: тухайн яриаг оператор авсан (хүнд шилжсэн) эсэх.

Хуучин үнэ: барааны үнийг сольсон ч таны гараар бичсэн текстэд (мэдлэгийн бичлэг, барааны тайлбар, коммент хариу, flow) хуучин үнэ үлддэг. Систем үүнийг илрүүлж "Хуучин үнэ илэрсэн" гэж сануулна, гэхдээ өөрөө засахгүй. Үнийг мэдлэгийн санд давхар бичихгүй байх нь хамгийн сайн: бот бараан дээрх үнийг шууд уншдаг.

Туршилтын чатад хариулж, бодит чатад хариулахгүй бол тухайн суваг "Унтраах" горимд, эсвэл яриа операторт шилжсэн байна.

Асуулт бүрт эхлээд өөрөө хариулаад, дараа нь хариултыг нээж шалгаарай.

1. AI-г асааж, унтраах унтраалга хаана байдаг вэ?

   Зөвхөн AI ажилтан, Ажиллуулах хуудсанд: "AI автомат хариулт" мастер ба Суваг бүрийн AI.

2. Харилцагч асуусан ч бот хариулж чадаагүй асуултыг хаанаас олох вэ?

   Сургах хуудасны Цоорхой хэсгээс. Хариулт бичих, Мэдлэгийн санд нэмэх.

3. Санал болгох горимд AI-ийн хаясан санал сарын хязгаарт тооцогдох уу?

   Тийм. AI хариуг бичсэн тул хязгаарт тооцогдоно.

4. Туршилтын чат хариулахгүй байна, юуг шалгах вэ?

   Мастер унтраалга асаалттай эсэхийг. Туршилтын чат зөвхөн мастер асаалттай үед хариулна.

5. Барааны үнийг мэдлэгийн санд давхар бичих хэрэгтэй юу?

   Үгүй. Бот бараан дээрх үнийг шууд уншдаг. Давхар бичвэл үнэ солиход хуучирна.

Дараагийн хичээл: Харилцагч ба CRM, дараа нь Бараа, захиалга, төлбөр.