Энэ бол Flow Studio-гийн гурван хичээлийн эхнийх. Та өмнө нь ямар ч автоматжуулалт хийж байгаагүй гэж үзээд эхнээс нь тайлбарлана.

Дуусахад та: flow хэзээ хэрэгтэй, хэзээ AI ажилтан хангалттайг ялгаж, шинэ flow үүсгэж, эхлүүлэх нөхцөлөө зөв сонгож, canvas дээр node нэмж холбож, ноорогоо хадгалаад Publish хийж, шаардлагатай бол өмнөх хувилбар руу буцааж чадна.

Дараагийн хоёр хичээлд node бүрийг (Flow Studio 2) болон AI node-уудыг (Flow Studio 3) нарийвчлан үзнэ.

Flow засварлахад компьютерийн том дэлгэц хэрэгтэй (1280 цэгээс өргөн). Утаснаас зөвхөн харах боломжтой.

Хамгийн чухал гурван ойлголт: эхлүүлэх нөхцөл (flow-г юу асаадаг), node (нэг алхам), Хадгалах ба Publish-ийн ялгаа. Эдгээрийг ойлговол бусад нь амархан.

Flow-г бичсэн зааварчилгаа гэж бодоорой: "Хэрэв харилцагч 'хүргэлт' гэж бичвэл, эхлээд мэндэл, дараа нь нэрийг нь асуу, дараа нь утсыг нь асуу, эцэст нь ажилтанд шилжүүл."

• Эхлэлийн нөхцөл нь flow-г хэзээ асаахыг шийднэ. Нэг flow нэг л нөхцөлтэй.
• Node гэдэг нь нэг алхам. Canvas дээр жижиг карт хэлбэртэй.
• Шугам (edge) нь алхмуудыг дараалалд нь холбоно. Нөхцөл, A/B хуваах зэрэг салаалдаг node хэд хэдэн гарцтай, гарц бүрээс өөр зам руу шугам татна.

Flow нь AI ажилтныг орлохгүй, түүний дээр ажилладаг нэмэлт давхарга. Flow-д тохирохгүй бүх мессежид AI ажилтан ердийнхөөрөө хариулсаар байна.

Энгийн дүрэм: хариулт нь урьдчилан мэдэгдэж байвал flow, мэдэгдэхгүй бол AI ажилтан.

AI ажилтан чөлөөт асуултад сайн: мэдлэгийн сан, бараа, бизнесийн мэдээллээсээ хариу бүтээнэ. Гэхдээ "заавал эхлээд утсыг асуу, дараа нь хаягийг асуу" гэсэн хатуу дарааллыг барихад flow илүү найдвартай.

Flow дотор ч AI ашиглаж болно: санааг ангилах, мэдээлэл ялгаж авах, мэдлэгийн сангаас хайх зэрэг AI node-ууд бий (Flow Studio 3 хичээл). Тэгэхээр "flow эсвэл AI" гэхээсээ илүү "дараалал хэрэгтэй юу" гэж асуугаарай.

Шинэ ажилтан хамгийн их андуурдаг зүйл бол "flow хийчихсэн чинь яагаад ажиллахгүй байна" гэдэг. Дараах дөрвийг шалгаарай:

1. Flow-ийн төлөв Идэвхтэй байх. Жагсаалтын Төлөв багана дээр харагдана. Шинэ flow үргэлж Draft төлөвтэй үүснэ, та өөрөө Идэвхжүүлнэ.
2. AI асаалттай байх. AI ажилтан цэсний Ажиллуулах хуудсанд "AI автомат хариулт" унтраалга асаалттай, "Суваг бүрийн AI" хэсэгт тухайн суваг Унтраах эсвэл Гадаад бот горимд биш байх ёстой. AI унтраалттай үед flow ч ажиллахгүй.
3. Нөхцөл таарвал flow түрүүлж ажиллана, тэр мессежид AI ажилтан давхар хариулахгүй.
4. Харилцагч flow-ийн дунд (жишээ нь асуултад хариулах гэж байгаа) бол түүний дараагийн мессеж тэр flow-ийн хариулт болно. Харилцагч "болих", "цуцлах" гэж бичвэл хүлээж буй flow цуцлагдаж "За, цуцаллаа." гэсэн хариу очно.

Нэг харилцагчид нэг зэрэг нэг л flow явна.

Хажуугийн цэсний Автоматжуулалт шатнаас Автомат аппыг сонгоод Автоматжуулалт хэсэг рүү орно. Хуудасны гарчиг нь "Урсгалууд".

Дээд талын табууд flow-уудыг төлвөөр нь шүүнэ: Бүгд, Идэвхтэй, Draft (хараахан идэвхжүүлээгүй), Зогссон. Хажууд нь нэрээр хайх талбар бий.

Хүснэгтийн багана: - Нэр — flow-ийн нэр, дарвал засварлагч нээгдэнэ. - Эхлүүлэгч — эхлүүлэх нөхцөл ба утга, жишээ нь "Түлхүүр үг: бүртгэл". - Төлөв — Идэвхтэй, Draft эсвэл Түр зогссон. - Ажилласан — хэдэн удаа гүйсэн.

Мөрийн баруун талын "..." цэсэнд: Засах, Идэвхжүүлэх эсвэл Зогсоох, JSON экспорт (OpenBot .json), JSON экспорт (n8n), Устгах. Устгавал буцаах боломжгүй, гэхдээ гүйцэтгэлийн түүх хадгалагдана.

Хуудасны баруун дээд "..." цэсэнд Импорт (JSON файл оруулах) ба Заавар байна. Цэсний доор Flow тайлан, AI апп, Marketplace, Форм, Цэс хэсгүүд бий.

Шинэ flow дарахад "Flow үүсгэх" цонх гарна.

• AI-р үүсгэх — юу хиймээрээ байгаагаа Монголоор бичихэд AI бүтэн flow зурж өгнө. Энэ боломж Pro, VIP багцад. Багцад ороогүй бол карт саарал, "Танай багцад ороогүй боломж" гэж харагдана.
• Хоосон flow — хоосон canvas-аас эхэлнэ.
• Бэлэн загварууд — доор нь чиглэлийн шүүлтүүр (Бүгд, Борлуулалт, Цаг захиалга, Зөвлөгөө, Мэдээлэл, Дэмжлэг, Ресторан, кафе...) ба загварын картууд. Карт бүр эхлүүлэх нөхцөлөө харуулна, жишээ нь "Түлхүүр үг: тусламж". AI тэмдэгтэй загвар AI node агуулдаг тул Lite ба түүнээс дээш багцад ажиллана. Ноорог болгон хэнд ч үүсгэж болно.

Анхаар: загвар эсвэл AI-аар үүсгэсэн flow-ийн граф үүсмэгц Publish хийгдэнэ ("Flow үүсч амьд боллоо" гэсэн мэдэгдэл гарна). Гэвч flow-ийн төлөв Draft хэвээр тул харилцагчид хүрэхгүй: агуулгаа шалгаж засаад, дараа нь Идэвхжүүлэх дарна. Хоосон flow-д Publish хийх юм байхгүй.

Бодит dashboard дээрх бичлэг (31 секунд, хадмалтай).

1. Автоматжуулалт хуудсанд Шинэ flow. Цонхонд гурван зам: AI-р үүсгэх, бэлэн загварууд (чиглэлээр шүүнэ), Хоосон flow.
2. Хоосон flow-ийн маягт: Нэр, Тайлбар, Эхлүүлэх нөхцөл (7 төрөл: Түлхүүр үг, Товч дарах, Эхний мессеж, Гараар, Хуваарь, Гадны webhook ирэх, API дуудлага), Түлхүүр үг, Эрэмбэ.
3. Үүсгэх дарахад хоосон canvas нээгдэнэ: зүүн талд node-ийн самбар, голд canvas, баруун талд сонгосон node-ийн тохиргоо.
4. Самбараас node-ийг товшиж (эсвэл чирж) нэмнэ. Эхлээд Эхлэл, дараа нь Мессеж илгээх гэх мэт.
5. Сүүлийн кадр: энэ хичээлийн жишээ "Хүргэлтийн захиалга" flow бүтнээрээ. Node бүрийн тохиргоог Flow Studio 3 хичээлийн бичлэгт үзүүлнэ.

Бичлэгт canvas-ыг өргөн харуулахын тулд хажуугийн цэсийг хураасан (зүүн дээд булангийн товч эсвэл Cmd+B).

Хоосон flow эсвэл загвар сонгоход "Flow тохируулах" маягт гарна (загвар бол түүний утгууд урьдчилан бөглөгдсөн, "Өөрчлөх" дарж өөр загвар сонгож болно).

1. Нэр — заавал, 80 тэмдэгтээс ихгүй. Жагсаалтад ингэж харагдана.
2. Тайлбар (заавал биш) — 200 тэмдэгт хүртэл.
3. Эхлүүлэх нөхцөл — дараагийн слайдад нэг бүрчлэн үзнэ. Түлхүүр үг болон Товч дарах нөхцөлд утга заавал бичнэ.
4. Эрэмбэ (priority) — тоо. Нэг мессеж хоёр flow-ийн нөхцөлд зэрэг таарвал эрэмбэ өндөртэй нь ажиллана. Тэнцүү бол эрт үүссэн нь.
5. Үүсгэх дарахад flow-ийн засварлагч (canvas) нээгдэнэ.

Чухал: эхлүүлэх нөхцөлийг үүсгэсний дараа өөрчилж болохгүй. Canvas дээрх Эхлэл node-ийг сонгоход "Trigger нь flow үүсгэх үед тогтоогддог" гэж бичсэн байдаг. Нөхцөл өөр байх хэрэгтэй бол шинэ flow үүсгэнэ (хуучнаа JSON экспортлоод импортлож, дараа нь шинэ нөхцөлтэй flow-д хуулж болно).

"AI-р үүсгэх" картыг дарахад "AI-р flow үүсгэх" цонх гарна (Pro, VIP багц).

1. Flow төрөл заавал: Танилцуулга нь цуврал асуулт, хариултаар бизнесээ танилцуулдаг, Форм нь харилцагчаас мэдээлэл цуглуулдаг.
2. Форм төрөлд Бэлэн загварууд гэсэн гурван товч бий. Дарвал тайлбар автоматаар бөглөгдөнө.
3. Тайлбар — дор хаяж 20, дээд тал нь 2000 тэмдэгт. Илүү дэлгэрэнгүй бичих тусам сайн: ямар үгээр эхлэх, ямар мессеж илгээх, юу асуух, эцэст нь юу хийхийг бичээрэй. Жишээ: "'хүргэлт' гэж бичихэд мэндэлж, нэр, утас, хаягийг нь асуугаад, ажилтанд шилжүүлдэг flow."
4. Үүсгэх дарахад "AI үүсгэсэн flow" цонх гарна: flow-ийн нэрийг засаж, эхлүүлэх нөхцөлийг харна. Таалагдахгүй бол Дахин үүсгэх.
5. Хадгалах дарахад flow үүсэж засварлагч нээгдэнэ.

AI-ийн бичсэн текстийг заавал уншаарай. Мессежид "{{contact.name}}" гэх мэт хувьсагч оруулсан байвал flow дотор ийм хувьсагч байхгүй тул хоосон гарна, устгаад энгийн текст болгоорой (Flow Studio 3 хичээлийн хувьсагчийн слайдыг үз).

Түлхүүр үг — харилцагчийн мессеж таны бичсэн утгыг *агуулж* байвал эхэлнэ, том жижиг үсэг хамаагүй. "захиалга" гэж бичвэл "Захиалга өгмөөр байна", "захиалгаа шалгах" хоёулаа таарна. Нэг харилцагчид нэг flow 24 цагийн дотор нэг л удаа түлхүүр үгээр эхэлнэ (давтан бичихэд дахин дахин мэндчилгээ илгээхгүйн тулд).

Товч дарах — Мессеж илгээх node-ийн Товчлуур, Carousel-ийн товч дарахад тэр товчны код (payload) flow-ийн утгатай яг тэнцүү бол эхэлнэ. Жишээ нь START_ORDER. Нэг үсэг зөрвөл ажиллахгүй.

Эхний мессеж — харилцагч танай workspace-д анх удаа бичихэд нэг удаа. Мэндчилгээ, цэсэнд тохиромжтой.

Гараар — мессежээр хэзээ ч эхлэхгүй. Өөр flow-оос "Дэд flow дуудах" node-оор дуудах туслах flow-д ашиглана.

Гадны webhook ирэх үед — Эхлэл node дээр Webhook URL гарна ("Хуулах", "Дахин үүсгэх"). Тэр URL руу POST хүсэлт ирэхэд flow эхэлж, хүсэлтийн талбарууд {{vars.нэр}} хувьсагч болно. Харилцагчгүй ажилладаг тул мессеж илгээх, асуух node ажиллахгүй. Ихэвчлэн хөгжүүлэгч ашиглана.

API дуудлага — Хөгжүүлэгчийн API-аар дуудна (Starter ба түүнээс дээш). Flow Studio 5 хичээлд үзнэ.

Хуваарь — цаг товлосон flow. Тун удахгүй нээгдэнэ, одоохондоо ашиглахгүй.

Түлхүүр үгийн утга бүхэлдээ нэг хайлтын хэллэг. Маягт дээрх жишээ "захиалга, үнэ, хэрхэн..." гэж харагддаг ч таслал нь хэд хэдэн үг гэсэн үг биш: систем "захиалга, үнэ" гэсэн бүтэн хэллэгийг хайна, харилцагч ийм юм бараг бичихгүй. Олон өөр үгэнд хариулах хэрэгтэй бол үг тус бүрт тусдаа flow хийх, эсвэл нэг flow дотор "Санаа ангилах" AI node ашиглах (Flow Studio 3).

Хэт өргөн үг аюултай: "үнэ" гэвэл "үнэтэй юу", "үнэгүй" гэсэн бүх мессеж flow-д очиж, AI ажилтан тэдэнд хариулахгүй. Хоёр-гурван үгтэй, тодорхой хэллэг сонгоорой: "хүргэлтээр захиалах", "уулзалт товлох".

Түлхүүр үгтэй flow нэг харилцагчид 24 цагт нэг л удаа эхэлдэг тул тест хийхдээ өөр хаягаар, эсвэл засварлагчийн Тест товчоор шалгаарай.

Flow-ийн нэр дээр дарахад засварлагч нээгдэнэ. Дээд мөрөнд: буцах сум, flow-ийн нэр (дээр нь харандаа гарч нэрээ засна), төлөв (Идэвхтэй, Draft, Түр зогссон), Publish хийсэн бол "Амьд: v3" гэх мэт хувилбарын тэмдэг, Хадгалах, Publish, "..." цэс.

Зүүн самбар "Node-ууд" — node бүр нэг мөр. Мөрийг товшвол canvas-ийн голд нэмэгдэж шууд сонгогдоно; эсвэл чирж хүссэн газраа тавина. Гараас: Tab-аар сонгоод Enter. Багцад ороогүй node цоожтой, бүдэг харагдах ба дарвал Багц хуудас руу очно.

Гол хэсэг (canvas) — node бүрийн дээд талд оролтын цэг, доод талд гаралтын цэг байна. Гаралтын цэгээс хулганаа дарсаар дараагийн node-ийн оролтын цэг рүү чирж тавихад шугам үүснэ. Шугамыг сонгоод Delete (эсвэл Backspace) дарвал устна. Node-ийг устгахдаа баруун самбарын хогийн савыг дарна (Delete товч node устгахгүй).

Баруун самбар "Тохиргоо" — node сонгоогүй үед "Canvas дээрх node-г сонгоно уу" гэж харагдана. Node дээр дарахад Нэр болон тухайн node-ийн бүх тохиргоо гарна. Өөрчлөлт шууд canvas дээр тусна, гэхдээ хадгалагдахгүй: Хадгалах дарах хүртэл.

Зүүн доод булан — томруулах (+), жижигрүүлэх (-), бүгдийг дэлгэцэнд багтаах, түгжих. Баруун доод булан — жижиг зураг (minimap): том flow-д хаана байгаагаа харна, өнгө нь node-ийн төрлийг заана.

Холбох дүрэм (зөрчвөл Publish хийх үед алдаа гарна): 1. Эхлэл нэг л байна. Хоосон flow-д эхлээд "Эхлэл" node нэмнэ. Эхлэл рүү орох шугам байж болохгүй. 2. Шугам үргэлж нэг node-ийн доод цэгээс нөгөөгийн дээд цэг рүү. 3. Салаалдаг node (Нөхцөл: Тийм / Үгүй, A/B хуваах, Санаа ангилах, Instagram дагалт шалгах, Давталт, Зэрэгцээ) гаралтын цэг бүр нэртэй. Цэг бүрээс тохирох зам руу шугам тат. Холбогдоогүй цэгээр явсан харилцагчийн flow тэнд л дуусна (алдаа биш, гэхдээ харилцагч хариугүй үлдэнэ). 4. Тойрог хориотой: доод node-оос дээд node руу буцааж холбож болохгүй. "Буруу хариулт бол дахин асуу" гэдгийг Асуулт node өөрөө хийдэг (Дахин оролдлого тохиргоо). 5. Хоёр өөр салаа нэг node руу нийлж болно, жишээ нь хоёр салаа хоёулаа Операторт шилжүүлэх рүү. 6. Төгсгөл node-оос гарах шугам байхгүй, түүн рүү ядаж нэг шугам орсон байх ёстой. Төгсгөл заавал биш: сүүлийн node-оос гарах шугамгүй бол flow тэнд дуусна.

Хадгалах (хүрээтэй товч) — canvas-ийн өөрчлөлтийг ноорогт хадгална. "Ноорогт хадгалагдлаа, Publish хийтэл бодит чатад нөлөөлөхгүй" гэсэн мэдэгдэл гарна. Canvas-ийн дээр "Нийтлэгдээгүй өөрчлөлт бий" мөр гарч, хажууд нь Ноорог тест (ноорогоо турших) ба Ноорог хаях (ноорогийг устгаж амьд flow руу буцах) товчнууд байна. Ноорог хадгалахад алдаа шалгадаггүй, дутуу ажлаа ч хадгалж болно.

Publish (дүүргэсэн цэнхэр товч) — "flow-г publish хийх үү?" гэж асууна. Зөвшөөрвөл ноорог шалгагдаж, алдаагүй бол амьд граф болно: "Publish хийгдлээ, vN амьд боллоо". Хадгалаагүй өөрчлөлт байвал Publish өөрөө эхлээд хадгална. Алдаатай бол "Publish хийгдсэнгүй, ноорогт алдаа байна" гэж аль node-д юу буруу байгааг үгчлэн харуулна.

Идэвхжүүлэх / Зогсоох — "..." цэсэнд (эсвэл жагсаалтын мөрийн цэсэнд). Идэвхжүүлэхэд "Нөхцөл нь тохирсон харилцагч бүрд энэ flow шууд ажиллаж эхэлнэ" гэж, Зогсооход "Дундуур яваа харилцан яриа тасарч болзошгүй" гэж асууна.

Дараалал: хоосон flow → зурна → Хадгалах → Ноорог тест → Publish → Идэвхжүүлэх. Дараа нь засах бүрдээ: засна → Хадгалах → тест → Publish (Идэвхтэй хэвээр).

Flow-ийн нэрийг (дээд мөрний харандаа) өөрчлөх нь ноорогт биш, шууд хадгалагддагийг анхаараарай.

Засварлагчийн "..." цэснээс Түүх дарахад "Хувилбарын түүх" цонх нээгдэнэ. Мөр бүр: хувилбарын дугаар (v1, v2...), төрөл, огноо, node ба шугамын тоо.

• Нийтлэгдсэн — Publish-ээр амьд болсон хувилбар.
• Snapshot — Publish эсвэл буцаалтын өмнөх амьд графын автомат хуулбар. Ингэснээр ямар ч алхам буцаагдах боломжтой.

Харах нь тэр хувилбарын графыг (JSON) харуулна. Буцаах нь "v2 рүү буцаах уу?" гэж асуугаад амьд графыг тэр хувилбар болгоно. Одоогийн амьд граф автоматаар snapshot болж хадгалагдах тул буцаалтаа ч буцааж болно. Таны засаж байсан ноорог хөндөгдөхгүй.

Хувилбар Publish хийх бүрт автоматаар үүснэ, хамгийн сүүлийн 50 snapshot хадгалагдана.

Ашиглах жишээ: шинэ хувилбар Publish хийсний дараа харилцагчид гомдоллож эхэлбэл Түүх рүү ороод өмнөх Нийтлэгдсэн хувилбар руу буцааж, тайван засна.

Бичлэг (19 секунд, хадмалтай):

1. Талархлын мессежийн текстийг засаад Хадгалах. Шар мөр "Нийтлэгдээгүй өөрчлөлт бий" гарна: харилцагчид одоо ч хуучин хувилбарыг харж байна.
2. Гурван цэгтэй цэс, Түүх: Publish бүр Нийтлэгдсэн хувилбар болно, Publish-ийн өмнө амьд байсан граф автоматаар Snapshot болж хадгалагдана. Мөр бүр node ба холбоосын тоо, огноотой.
3. Өмнөх хувилбар дээр Буцаах: "Одоогийн амьд graph автоматаар snapshot хадгалагдана; ноорог хөндөгдөхгүй" гэж баталгаажуулна.
4. "v1 рүү амжилттай буцлаа": толгойн хэсэгт Амьд: v1.

Алдаатай хувилбар Publish хийчихвэл ингэж хэдхэн секундэд буцаана.

200 node — нэг гүйлтийн туршид дамжсан node-ийн тоо. Давталтын давхар бүр, дэд flow-ийн node бүр энд нэмэгдэнэ. Энгийн flow хэзээ ч ойртохгүй.

60 секунд — харилцагчийн хариу эсвэл Хүлээх node хүртэлх нэг тасралтгүй хэсэг. Ихэвчлэн гадны систем (Webhook дуудах) удаан хариулбал хүрнэ.

24 цаг — эхэлснээс хойш 24 цагт дуусаагүй гүйлт (жишээ нь харилцагч асуултад хэзээ ч хариулаагүй) автоматаар цуцлагдана, Хариултууд хуудсанд "Орхисон" болно.

Дэлгэц — 1280 цэгээс нарийн дэлгэцэнд (таблет, утас) засварлагч нээгдэхгүй, "Flow засварлахад том дэлгэц хэрэгтэй" гэсэн хуудас node-уудын жагсаалтыг "Зөвхөн харах" горимоор харуулна.

Экспорт — жагсаалтын мөрийн цэснээс. OpenBot .json нь буцааж импортлоход, n8n нь n8n платформд зориулагдсан. Webhook дуудах node-ийн нууц header (жишээ нь Authorization) утга файлд орохгүй, импортлосны дараа дахин бичнэ.

Импорт — Урсгалууд хуудасны "..." цэс, Импорт. JSON файл сонгох эсвэл текст буулгах, хүсвэл шинэ нэр. Импортлосон flow Draft төлөвтэй орно.

Publish-ийн алдааны мессеж аль node-д юу буруу байгааг үгчлэн нэрлэдэг (заримдаа англиар). Түгээмэл нь: - асуултын текст хоосон (empty prompt), - Сонголт (enum) төрөлд 2-оос цөөн сонголт, - Асуулт node-ийн Сонголт горимд сонголт байхгүй, эсвэл давхардсан код, - ижил талбарын түлхүүр хоёр асуултад, - тойрог (cycle detected), - Эхлэл node байхгүй (no trigger node), - Төгсгөл рүү шугам ороогүй.

Flow-г зогсоовол дундуур явж байсан харилцагчид хариугаа хүлээсээр үлдэж магадгүй тул ачаалал багатай цагт зогсоогоорой.

Асуулт бүрт эхлээд өөрөө хариулаад, дараа нь хариултыг нээж шалгаарай.

1. Хадгалах дарсны дараа харилцагчид шинэ хувилбарыг харах уу?

   Үгүй. Хадгалах нь ноорог. Publish хийсний дараа л амьд болно.

2. Загвараас үүсгэсэн flow шууд харилцагчид ажиллах уу?

   Үгүй. Граф нь Publish хийгдсэн ч төлөв Draft. Шалгаад Идэвхжүүлнэ.

3. "захиалга, үнэ" гэсэн түлхүүр үг хоёр үгэнд тус бүр ажиллах уу?

   Үгүй. Бүтэн хэллэгийг хайна. Нэг flow-д нэг хэллэг.

4. Гараар нөхцөлтэй flow юунд хэрэгтэй вэ?

   Өөр flow-оос Дэд flow дуудах node-оор дуудах туслах flow хийхэд.

5. Publish хийснийхээ дараа алдаа олдвол яах вэ?

   "..." цэс, Түүх, өмнөх Нийтлэгдсэн хувилбар дээр Буцаах.

Дараагийн хичээл: Node бүрийн лавлах (Flow Studio 2), дараа нь AI node-ууд (Flow Studio 3).