Энэ хичээл бол лавлах: flow зурж байхдаа "энэ node яг юу хийдэг билээ" гэж эргэж хардаг газар. Flow Studio 1 хичээлийг (canvas, Хадгалах, Publish) үзсэн гэж үзнэ.

Node-ууд самбарын дарааллаар биш, хэрэглээгээр нь бүлэглэсэн: харилцагчтай ярих, хүлээх, салаалах, үйлдэл хийх, өгөгдөлтэй ажиллах. AI node-ууд (AI хариулт, LLM, мэдлэгийн сан, санаа ангилах, мэдээлэл ялгах, AI форм, AI чадвар) дараагийн Flow Studio 3 хичээлд.

Node бүрийн тохиргоог canvas дээр тэр node-ийг сонгоход баруун талын Тохиргоо самбарт харна. Бүх node-д эхэнд нь Нэр талбар бий: энэ нь зөвхөн canvas дээр харагдах шошго, харилцагчид очихгүй. Нэрийг ойлгомжтой бичээрэй: "Утас асуух", "VIP эсэхийг шалгах".

Node-ууд самбарт 28 орчим мөр бий. Энэ хичээлд AI-гүй бүх node-ийг дөрвөн бүлгээр үзнэ.

• Ярих — харилцагчид мессеж илгээдэг эсвэл түүнээс хариу хүлээдэг node-ууд.
• Хүлээх, салаалах — flow-ийн замыг шийддэг node-ууд: хэзээ үргэлжлэх, аль салаагаар явах, хэдэн удаа давтах.
• Үйлдэл — харилцагчид юу ч бичихгүйгээр системд өөрчлөлт хийнэ: шошго, оператор, захиалга.
• Өгөгдөл — хувьсагч тохируулах, гадны системтэй холбогдох.

Самбарт Скрипт (JS) гэсэн node бас харагдана: тун удахгүй нээгдэнэ, одоохондоо flow-д бүү ашигла.

Салаалдаг node-ийн гаралтын цэг бүр нэртэй (Тийм, Үгүй, Дагадаг...). Аль нэг цэг холбогдоогүй бол тэр салаагаар явсан харилцагчийн flow тэнд дуусна.

Эхлэл — flow-ийн цор ганц эхлэх цэг. Тохиргооны самбарт нэр л засагдана. Эхлүүлэх нөхцөл үүсгэх үед тогтдог тул энд "Trigger нь flow үүсгэх үед тогтоогддог" гэсэн тайлбар л байна. - Нөхцөл нь Гадны webhook ирэх үед бол энд Webhook URL, Хуулах, Дахин үүсгэх товч гарна. Дахин үүсгэвэл хуучин URL ажиллахаа болино. - Нөхцөл нь API дуудлага бол энд "API-аар дуудах" самбар гарна (Flow Studio 5).

Төгсгөл — flow-ийг дуусгана. Гарах шугамгүй, түүн рүү дор хаяж нэг шугам орсон байх ёстой. Тохиргоо: Буцаах утга (JSON) — заавал биш. Энэ flow-г өөр flow "Дэд flow дуудах" node-оор дуудах, эсвэл API-аар дуудахад буцаах өгөгдөл. Текст утгад {{хувьсагч}} бичиж болно, жишээ: {"phone": "{{answers.phone}}"}. Энгийн чатын flow-д хоосон орхино.

Төгсгөл заавал биш: шугамгүй сүүлийн node дээр flow мөн дуусна. Гэхдээ Төгсгөл тавьбал canvas уншихад ойлгомжтой.

Мессеж илгээх node харилцагчид нэг мессеж илгээгээд шууд дараагийн node руу явна (хариу хүлээхгүй). Тохиргоо: Мессежийн төрөл ба Текст (хажууд нь {{хувьсагч}} гэсэн сануулга).

• Текст — энгийн бичвэр. Өмнөх асуултын хариуг оруулж болно: "Баярлалаа, {{answers.name}}!"
• Товчлуур — текстийн доор 3 хүртэл товч ("+ Товчлуур нэмэх"). Товч бүр Postback (дарахад код илгээнэ, жишээ нь ORDER_STATUS; ийм кодтой "Товч дарах" нөхцөлтэй flow эхэлнэ) эсвэл URL (вэб хуудас нээнэ).
• Carousel — хажуу тийш гүйлгэдэг картууд, 10 хүртэл. Карт бүр Гарчиг (заавал), Дэд гарчиг, Зургийн URL, товчнуудтай. Дээш, Доош товчоор дарааллыг солино.
• Файл (PDF/видео/аудио) — Медиа сангаас 3 хүртэл файл сонгоно. Энэ төрөл Медиа сангийн эрхтэй (Starter ба түүнээс дээш) багцад л харагдана.
• Хурдан хариулт — сонголтын товчнууд. Харилцагч сонгоход хариуг хадгалж, буруу бичвэл дахин асуух хэрэгтэй бол Асуулт node-ийн Сонголт горим эсвэл Сонголт (enum) талбарыг ашиглаарай: тэр нь хариуг шалгаж, хадгалж, хүлээдэг.

Дэлгүүрийн жишээ: Номин дэлгүүр шинэ коллекцоо Carousel-аар 5 карт болгож харуулна, карт бүрт "Дэлгэрэнгүй" (URL) товч.

Мессежийн текстэд AI-ийн бичсэн хувьсагч орвол хамгаалалтын шалгалтаар орно (Flow Studio 3).

Асуулт node мессеж илгээгээд харилцагчийн дараагийн мессежийг хүлээнэ, хариуг шалгаж хадгалаад дараагийн node руу явна. Тохиргоо:

• Горим: Чөлөөт хариулт эсвэл Сонголт.
• Асуултын текст (заавал): "Хүргүүлэх хаягаа бичнэ үү."

Чөлөөт хариулт горимд: - Талбарын түлхүүр — зөвхөн жижиг латин үсэг, тоо, доогуур зураас, 40 хүртэл, flow дотор давтагдахгүй. Жишээ: phone, address. Дараа нь {{answers.phone}} гэж уншина. - Талбарын нэр — хүнд ойлгомжтой нэр ("Утас"). Хариултууд хуудсанд багана болно. - Талбарын төрөл — дараагийн слайд. - Заавал бөглөнө.

Сонголт горимд: Сонголтууд (1-11). Сонголт бүр гарчиг, код (автоматаар санал болгоно: кирилл гарчигт Q1, Q2 гэх мэт), мөн сонгосны дараа харилцагчид илгээх текст (заавал биш). Сонгосон гарчиг хадгалагдана. Дараа нь сонголтоор салаалах хэрэгтэй бол Чөлөөт хариулт горимын Сонголт (enum) төрлийг ашигла: түүний хариу таны өгсөн түлхүүрээр хадгалагдаж Нөхцөл node-д уншигдана.

Дахин асуух текст (заавал биш) ба Дахин оролдлого (1-5): буруу хариулт ирэхэд дахин асууна. Хоосон бол "Уучлаарай, ойлгосонгүй." гэж асуултаа давтана. Оролдлого дуусвал "Уучлаарай, энэ асуултыг алгасъя." гэж хариуг хоосон хадгалаад үргэлжилнэ.

Харилцагч зураг илгээвэл (файлын асуулт биш бол) асуулт дахин явуулахгүйгээр хүлээсээр байна. "болих", "цуцлах", "болилоо", "cancel" гэвэл flow цуцлагдана.

Хариу бүр flow-ийн "..." цэсний Хариултууд хуудсанд хадгалагдана (Бөглөж буй, Дууссан, Орхисон; CSV татах).

Талбарын төрөл нь хариуг шалгадаг. Буруу хариулт ирвэл дахин асууна.

• Текст — юу ч хүлээн авна.
• Утас — утасны дугаар. Зөв бол харилцагчийн картын утас руу автоматаар бичигдэнэ.
• И-мэйл — имэйл. Харилцагчийн имэйл рүү бичигдэнэ.
• Сонголт (enum) — "Сонголтууд (≥2)"-д бичсэн утгууд товч болж очно. Харилцагч товч дарах эсвэл бичих ("өглөө" гэвэл "Өглөө 09:00-12:00" таарна) боломжтой, хадгалагдах нь таны бичсэн яг утга. Тиймээс Нөхцөл node-д "= Тийм" гэж найдвартай шалгана.
• Тоо — бүхэл тоо.
• Огноо — "маргааш", "7 сарын 30" гэх мэт монгол бичвэрийг ойлгож 2026-07-30 хэлбэрт оруулна.
• Цаг — "15:00", "орой 7" ойлгоно. "3 цаг" шиг тодорхойгүй бол дахин асууна.
• Зураг / Файл — харилцагч зураг хавсаргах ёстой, текст бичвэл "Зурагаа хавсаргаж илгээгээрэй." гэж дахин асууна. Messenger, Instagram-ын зургийн холбоос хэдэн хоногийн дараа хүчингүй болж магадгүй тул чухал зургийг цагтаа татаж аваарай.

Хаяг: Текст төрлийн талбарын түлхүүрт address гэсэн үг, эсвэл нэрэнд "хаяг" гэсэн үг байвал хариу харилцагчийн хаяг руу автоматаар бичигдэнэ.

Нөхцөл node утгыг шалгаад өөр өөр салаагаар явуулна. Горим гэсэн хоёр сонголт бий.

Энгийн — Талбар (жагсаалтаас), Оператор, Утга. Хоёр гаралтын цэг: Тийм, Үгүй. Талбарын жагсаалтад олон зүйл харагддаг ч flow дотор найдвартай ажилладаг нь message.text (харилцагчийн сүүлд бичсэн текст). Асуултын хариу, хувьсагчаар шалгах бол Олон салаа горим хэрэглэ.

Олон салаа — горимыг солиход "Тийм / Үгүй гарцууд болон шугамууд устна" гэж асууна. Дараа нь: - Салаа нэмэх — салаа бүр Салааны нэр (латин: vip, yes; else, true, false хориотой), Нөхцөлүүд (Бүгд биелэх эсвэл Аль нэг нь биелэх), Нөхцөл нэмэх. - Нөхцөл бүр: талбар (гараар бичнэ, жишээ answers.confirm), оператор, утга. - Салаанууд дээрээс доош шалгагдаж эхний таарсанаар явна. Аль нь ч таарахгүй бол Үгүй бол гарц.

Операторууд: = (тэнцүү, үсэг бүрээр яг таарах), ≠, > , <, ≥, ≤ (тоогоор), агуулсан (том жижиг үсэг хамаагүй), жагсаалтад байх / байхгүй (утгад таслалаар: Тийм,Тиймээ), Хоосон, Хоосон биш.

Дэлгүүрийн жишээ: Сонголт (enum) асуултаар "Хүргэлт" эсвэл "Очиж авах" гэж асуугаад, Олон салаа: салаа delivery (answers.method = Хүргэлт) нь хаяг асуух руу, Үгүй бол нь салбарын хаяг илгээх рүү.

Хүлээх node flow-ийг түр зогсоогоод дараа нь үргэлжлүүлнэ. Тохиргоо: Хүлээх гэсэн хоёр горим.

• Хугацаагаар — Хугацаа (тоо) ба Нэгж (Секунд, Минут, Цаг). Анхдагч 5 секунд. Систем хүлээлтийг минут тутам шалгадаг тул богино хүлээлт ч бодитоор минут хүртэл үргэлжилж болно.
• Огноо хүртэл — Огноо, цаг: 2026-10-01 09:00 хэлбэр (Улаанбаатарын цаг) эсвэл огноо агуулсан {{хувьсагч}} (жишээ нь Огноо асуултын хариу). 30 хоногоос хол бол алдаа. Өнгөрсөн цаг бол хүлээлгүй шууд үргэлжилнэ.

Анхаарах гурван зүйл: 1. Хүлээж байх хугацаанд харилцагч бичвэл тэр мессежид flow ч, AI ажилтан ч хариулахгүй. Тиймээс хэдэн цагийн хүлээлтээс зайлсхий. 2. Messenger, Instagram-д харилцагчийн сүүлийн мессежээс 24 цаг өнгөрсөн бол бизнес шинэ мессеж илгээж чадахгүй (Meta-гийн дүрэм). Хүлээлтийн дараах мессеж явахгүй. 3. Flow эхэлснээс 24 цагт дуусаагүй бол автоматаар цуцлагдана.

Дэлгүүрийн жишээ: захиалгын баталгаажуулалт илгээгээд 2 минут хүлээж "Өөр асуух зүйл байна уу?" гэж асуух.

Эдгээр node харилцагчид юу ч илгээхгүй, системд өөрчлөлт хийгээд шууд дараагийн node руу явна. Харилцагчид мэдэгдэх хэрэгтэй бол өмнө нь Мессеж илгээх node тавина.

Tag — Үйлдэл: Нэмэх эсвэл Хасах, Tag нэр. Нэмэхэд ийм нэртэй шошго байхгүй бол автоматаар үүснэ. Нэрэнд {{хувьсагч}} бичиж болно. Харилцагчид хуудсанд шүүх, маркетингийн бүлэг гаргахад ашиглана. Жишээ: "хүргэлт", "vip".

Операторт шилжүүлэх — Шалтгаан (заавал биш) нь дотоод тэмдэглэл. Энэ ярианд AI ажилтан түр зогсож, харилцагчид "Оператортой ярилцсан" шошго тавигдаж, Inbox-д ажилтан хариулах ёстой яриа болж харагдана (Inbox хичээл).

AI дахин идэвхжүүлэх — тохиргоогүй. Тэр ярианд түр зогсоосон AI-г буцааж асаана. Жишээ: асуулт асууж дууссаны дараа AI-д яриаг буцааж өгөх.

Гишүүнд оноох — Гишүүний ID: workspace-ийн идэвхтэй гишүүний дотоод дугаар (урт код). Буруу эсвэл идэвхгүй гишүүн бол node алдаагаар зогсоно. Гишүүний ID-г workspace-ийн эзнээс асууна.

Захиалга үүсгэх — харилцагчийн ноорог захиалгад (сагсанд) нэг бараа нэмнэ. Ноорог захиалга байхгүй бол шинээр үүснэ. Тохиргоо: - Бүтээгдэхүүний ID — барааны дотоод код. Бараа засах хуудсыг нээхэд хаягийн мөрөнд /products/ гэсний дараах урт код. - Эсвэл хувьсагчаас — ID-г хувьсагчаас авах (жишээ нь Webhook дуудах node-оос ирсэн утга). - Тоо ширхэг — тоо.

Бараа идэвхтэй, чатын каталогт харагддаг, дуусаагүй, ганц хувилбартай байх ёстой. Олон хувилбартай (хэмжээ, өнгө) бараа энэ node-оор нэмэгдэхгүй. AI ажилтны "Захиалга үүсгэх" чадвар унтраалттай бол мөн ажиллахгүй. Амжилттай бол захиалгын дугаар {{order_id}} хувьсагчид орно.

Энэ node харилцагчид юу ч илгээхгүй, төлбөрийн мэдээлэл ч явуулахгүй. Дараа нь Мессеж илгээх эсвэл Операторт шилжүүлэх node тавиад ажилтан захиалгыг Захиалга хуудсаас баталгаажуулна.

Форм илгээх — тохиргоогүй. Асуулт node-уудын хариултыг "Дууссан" болгож тэмдэглэнэ: flow-ийн Хариултууд хуудсанд Бөглөж буй мөр Дууссан таб руу шилжинэ. Сүүлийн асуултын дараа тавина. Үүнгүй бол харилцагч бүх асуултад хариулсан ч мөр Бөглөж буй хэвээр, 24 цагийн дараа Орхисон болно.

Энэ нь "Форм" хуудасны AI форм (Форм хичээл) биш, flow-ийн өөрийн асуултуудын хариулт.

Хувьсагч тохируулах node нэг дор хэд хэдэн хувьсагч өөрчилнө (+ Хувьсагч нэмэх). Хоосон бол "Дор хаяж нэг хувьсагч нэмнэ үү" гэж Publish татгалзана.

Мөр бүр: Үйлдэл, Хувьсагчийн нэр, Утга. - Оноох — хамгийн түгээмэл. Утга нь текст эсвэл {{хувьсагч}} хослол: "{{answers.name}} ({{answers.phone}})". - Жагсаалтад нэмэх — жагсаалтад нэг зүйл нэмнэ, 100 хүртэл. - Утгыг төрөлтэй нь хуулах — жагсаалт, объектыг текст болгохгүйгээр хуулна. Утгад яг нэг {{зам}}. - JSON задлах — гадны системээс ирсэн JSON текстийг задалж, {{нэр.талбар}} гэж уншдаг болгоно.

Нэрийн дүрэм: латин үсэг, тоо, доогуур зураас; тоогоор эхлэхгүй; "__"-ээр эхлэхгүй; message, flow, answers, ai_response, input гэсэн нэр хориотой (систем ашигладаг).

Хадгалсан хувьсагчийг дараагийн node-уудад {{нэр}} гэж уншина. Хувьсагч flow-ийн тэр гүйлтэд л амьдарна: дараагийн удаа flow эхлэхэд хоосноос эхэлнэ.

Webhook дуудах node гадны систем (таны сайт, Google Apps Script, нягтлангийн программ) руу HTTP хүсэлт илгээнэ. Ихэвчлэн хөгжүүлэгчтэй хамт тохируулна.

1. URL ба HTTP метод. Дотоод сүлжээний хаяг аюулгүй байдлын үүднээс блоклогдоно.
2. Толгой (header) — "+ Header нэмэх". Нэр (Authorization, X-API-Key...) ба утга. Нууц түлхүүрийг flow экспортлоход файлд оруулахгүй, импортлосны дараа дахин бичнэ.
3. Body загвар (JSON) — POST, PUT, PATCH-д. Жишээ: {"name": "{{answers.name}}", "phone": "{{answers.phone}}"}. Орлуулсны дараа зөв JSON байх ёстой, эс бөгөөс node алдаагаар зогсоно. Хоосон бол workspace, харилцагч, ярианы дугаар ба бүх хувьсагчтай стандарт body явна.
4. Хариунаас үнэ авах — хариуны JSON-оос утга авч хувьсагчид хадгална: нэр (order_no) ба зам (data.order.number, жагсаалтад data.items.0.id).
5. Дэлгэрэнгүй тохиргоо — Дахин оролдох хэмжээ (0-5), Хүлээх хугацаа (мс). Оролдлого бүр 10 секундын хугацаатай.

Хүсэлтийн дараа {{webhook_status}} (200, 404...) ба {{webhook_response}} (хариуны текст) хувьсагч бий болно. Нөхцөл node-оор webhook_status-ийг шалгаж амжилтгүй үед өөр салаагаар явуулж болно.

Дэлгүүрийн жишээ: захиалгын мэдээллийг хүргэлтийн компанийн систем рүү илгээж, буцаж ирсэн хүргэлтийн дугаарыг харилцагчид мессежээр илгээх.

Давталт — жагсаалтын элемент бүрээр ижил алхмуудыг давтана. Тохиргоо: - Жагсаалт — яг нэг {{зам}}, жишээ {{order.items}}. Хоосон бол 0 удаа. - Элементийн хувьсагч (анхдагч item), Дугаарын хувьсагч (index) — давталт бүрт одоогийн элемент ба дугаар. - Цуглуулах хувьсагч (заавал биш) — давталт бүрийн дараах тэр хувьсагчийн утгыг жагсаалт болгон цуглуулна. - Хамгийн их давталт (1-50) — жагсаалт үүнээс урт бол алдаа.

Хоёр гаралт: Давталт бүрт (дотор нь давтагдах node-ууд) ба Дууссаны дараа. Давталт дотор зөвхөн өгөгдөл боловсруулах node (хувьсагч, нөхцөл, HTTP, AI боловсруулалт...) байна; мессеж илгээх, асуух, хүлээх, шошго, захиалга хориотой: нэг харилцагчид 50 мессеж явахаас сэргийлнэ. Үр дүнг цуглуулаад давталтын дараа нэг мессежээр илгээ.

Дэд flow дуудах — нэг workspace-ийн өөр идэвхтэй flow-ийг яг энэ мөчид ажиллуулна. Тохиргоо: Дуудах flow, Оролт (нэр ба утга; дэд flow {{input.нэр}} гэж уншина), Үр дүнгийн хувьсагч (анхдагч sub) — дэд flow-ийн Төгсгөл node-ийн Буцаах утга энд хадгалагдана.

Дэд flow-д Асуулт, Хүлээх, Форм илгээх, Instagram дагалт шалгах node байж болохгүй, хамгийн ихдээ 3 давхар дуудна, өөрийгөө дуудаж болохгүй. Өөр идэвхтэй flow-оос дуудагддаг flow-г зогсоох, устгах боломжгүй (эхлээд дуудаж буй node-ийг хасна). Ноорог тестэд дэд flow ажиллахгүй (үр дүн хоосон).

Жишээ: "Хүргэлтийн үнэ тооцох" гэсэн Гараар нөхцөлтэй нэг flow хийж, хэд хэдэн захиалгын flow-оос дуудах.

Зэрэгцээ — хэд хэдэн тооцооллыг нэг зэрэг хийж хугацаа хэмнэнэ (жишээ нь хоёр өөр гадны системээс зэрэг асуух). Тохиргоо: - Салаанууд (2-8) — Салааны түлхүүр (жижиг латин: a, b, stock) ба нэр. - Нийлэх нөхцөл — Бүгд дуусахыг хүлээнэ (нэг нь алдвал бусдыг зогсоож Алдаа гарцаар) эсвэл Эхний амжилттай (эхэлж дууссаныг авна). - Зэрэг ажиллах дээд тоо (1-4), үр дүнгийн хувьсагч (анхдагч parallel): {{parallel.branches.a...}}.

Canvas дээр салаа бүр болон Алдаа гэсэн гаралтын цэг. Салаанд зөвхөн тооцооллын node (AI боловсруулалт, мэдлэгийн сан, ангилал, задлалт, HTTP, хувьсагч, нөхцөл); мессеж, асуулт, шошго хориотой. Бүх салаа нэг Нийлэх node-д нийлж, тэндээс урсгал үргэлжилнэ. Энэ нь ихэвчлэн хөгжүүлэгч, туршлагатай хэрэглэгчийн хэрэгсэл.

A/B хуваах — харилцагчдыг санамсаргүйгээр хувиар хуваана. Салаанууд (2-5, нийт 100%): түлхүүр, хувь (1-100 бүхэл), нэр. Нийлбэр яг 100 биш бол Publish татгалзана. Нэг харилцагч нэг гүйлтэд үргэлж ижил салаагаар явна.

Дэлгүүрийн жишээ: мэндчилгээний хоёр хувилбар туршина: a 50% ("Шинэ коллекц ирлээ!") ба b 50% ("Энэ долоо хоногт 10% хямдрал"). Хэдэн хоногийн дараа flow-ийн тайлангаас аль салаа нь илүү захиалгад хүрснийг харна.

Instagram дагалт шалгах — харилцагч таны workspace-ийн Instagram хаягийг дагадаг эсэхийг шалгаж гурван гарцын аль нэгээр явуулна: - Дагадаг — дагадаг. - Дагадаггүй — дагадаггүй. - Тодорхойгүй — Instagram биш яриа (Messenger, Telegram, вэб виджет), эсвэл Instagram мэдээлэл өгч чадаагүй. Энэ үед flow зогсохгүй, Тодорхойгүй гарцаар үргэлжилнэ. Тиймээс энэ гарцыг заавал холбо.

Тохиргоо: - Дагахыг хүсэх мессеж (заавал биш) — хоосон бол дагадаггүй харилцагч шууд Дагадаггүй гарцаар явна. Бичсэн бол мессеж + товч илгээж хариуг хүлээнэ. - Товчны текст — 20 тэмдэгт хүртэл, анхдагч "Дагасан". - Дахин шалгахад дагаагүй бол илгээх мессеж.

Харилцагч товч дарах (эсвэл ямар ч мессеж бичих) бүрд дахин шалгана, хамгийн ихдээ 2 удаа, дараа нь Дагадаггүй гарцаар. Үр дүн {{follow.status}} (yes, no, unknown).

Дэлгүүрийн жишээ: "Хямдралын код авах" flow. Дагадаг бол код илгээнэ, Дагадаггүй бол "Манай хуудсыг дагаад Дагасан товчийг дараарай" гэж хүснэ, Тодорхойгүй бол кодыг шууд илгээнэ.

Нэмэлт зөвлөмж: - Салаалдаг node-ийн бүх гарцыг холбо. Холбоогүй гарцаар явсан харилцагчийн flow чимээгүй дуусна. - Талбарын түлхүүрээ англи жижиг үсгээр, утгатай нэрлэ: phone, address, size. Хоёр асуултад ижил түлхүүр байж болохгүй. - Давталт, Зэрэгцээ дотор мессеж илгээх боломжгүй: үр дүнг цуглуулаад дараа нь нэг удаа илгээ. - Instagram дагалт шалгах node-ийн Тодорхойгүй гарцыг заавал холбо.

Асуулт бүрт эхлээд өөрөө хариулаад, дараа нь хариултыг нээж шалгаарай.

1. Харилцагчаас хариу хүлээдэг node аль нь вэ?

   Асуулт (мөн дагахыг хүсэх мессежтэй Instagram дагалт шалгах). Мессеж илгээх хүлээдэггүй.

2. Утас асуухад хариу хаана хадгалагдах вэ?

   {{answers.түлхүүр}} хувьсагчид, Хариултууд хуудсанд, мөн харилцагчийн картын утсанд.

3. Асуултын хариугаар салаалахын тулд Нөхцөл node-ийн аль горим вэ?

   Олон салаа. Талбарт answers.түлхүүр гэж гараар бичнэ.

4. Давталт дотор Мессеж илгээх node тавьж болох уу?

   Үгүй. Үр дүнг цуглуулаад давталтын дараа нэг удаа илгээнэ.

5. A/B хуваах node-ийн хувиудын нийлбэр хэд байх ёстой вэ?

   Яг 100. Үгүй бол Publish татгалзана.

Дараагийн хичээл: AI node, хувьсагч, мэдээлэл цуглуулах (Flow Studio 3), дараа нь тест ба алдаа хайх.