Энэ хичээл нь багаа удирддаг хүнд (эзэн, менежер) зориулагдсан. Дуусахад та ажилтан бүрийг урьж, түүнд яг хэрэгтэй эрхийг өгч, харах ярианых нь хүрээ болон сувгийг хязгаарлаж чадна.

Жирийн ажилтан энэ хичээлийг ойлгох зорилгоор уншина: яагаад зарим цэс танд харагдахгүй, яагаад зарим яриа жагсаалтад алга байгааг эндээс ойлгоно.

Хичээл зургаан хэсэгтэй. Эхний ойлголт (гурван тохиргоо) нь бусад бүх хэсгийн түлхүүр тул түүнийг сайн тогтоогоорой.

Ажилтан нэмэх бүрт гурван асуултад хариулна.

• Эрх: тэр хүн юу хийж чадах вэ? Жишээ нь яриа уншиж хариулах, бараа засах, AI-ийн тохиргоо өөрчлөх, баг удирдах.
• Хандалтын хүрээ: аль яриаг харах вэ? Бүх яриа, эсвэл зөвхөн өөрт нь оноогдсон болон хэнд ч оноогдоогүй яриа. Хүрээ нь эрхийн нэг хэсэг тул эрхийн хамт тохируулагдана.
• Сувгийн хандалт: аль сувгийн яриа харах вэ? Энэ нь хүн тус бүрт тусад нь тохируулагдана.

Гурвуулаа серверт хэрэгждэг. Өөрөөр хэлбэл хязгаартай ажилтан линк хуулж нээсэн ч хориотой яриаг харж чадахгүй.

Хажуугийн цэсний Тохиргоо апп руу ороод Баг хэсгийг сонгоно. Баг нь Мэргэжлийн шатанд багтдаг тул цэсэнд харагдахгүй бол Мэргэжлийн шатны "Нээх" дээр дарна, эсвэл хайлтаар (Cmd+K эсвэл Ctrl+K) "Баг" гэж бичнэ.

Хүснэгтэд гишүүн бүрийн нэр, эрх, сувгийн хандалт харагдана. Өөрийн мөр дээр "Та" гэсэн тэмдэг байна. Мөрийн төгсгөлийн гурван цэгтэй цэснээс эрхийн дэлгэрэнгүй, суваг хязгаарлах, эзэмшил шилжүүлэх, хасах үйлдлүүд гарна.

Хуудасны гарчгийн хажууд Таны эрх гэсэн тэмдэг таны одоогийн эрхийг харуулна. Гишүүн урих товч зөвхөн баг удирдах эрхтэй хүнд харагдана.

Баг бүх багцад, Free шатанд ч ажилладаг. Гишүүн тусдаа багц авах шаардлагагүй.

1. Баг хуудсанд Гишүүн урих дарна. "Багийн гишүүн урих" цонх нээгдэнэ.
2. Имэйл талбарт ажилтны имэйлийг бичнэ. Энэ нь ажилтан OpenBot-д нэвтрэх имэйл байх ёстой: урилгыг зөвхөн тэр хаягаар нэвтэрсэн хүн хүлээн авч чадна.
3. Эрх сонголтоос эрх сонгоно (дараагийн слайдууд). Эзэн эрхээр урих боломжгүй, эзэн ганц.
4. Урилга илгээх дарахад "Урилга илгээх үү?" гэж асууна, дахин баталгаажуулна.

Дараа нь хоёр зүйл болно: ажилтны имэйл рүү урилга явна, мөн урилгын холбоос таны санах ойд хуулагдана ("Урилгын холбоос хуулагдлаа"). Имэйл нь спам руу орсон бол холбоосыг ажилтанд Messenger эсвэл чатаар шууд илгээж болно.

Урилга 7 хоног хүчинтэй. Нэг имэйлд хүлээгдэж буй урилга аль хэдийн байвал дахин илгээхгүй. Та өөрт байхгүй эрхийг хэнд ч олгож чадахгүй: жишээ нь удирдагч хүн өөрөөсөө их эрхтэй өөрийн үүсгэсэн эрхээр урьж чадахгүй.

Ажилтан урилгын холбоосыг нээгээд урилга илгээсэн имэйлээрээ нэвтэрнэ (Google эсвэл имэйлийн нэг удаагийн код). Нэвтэрмэгц тэр workspace-д гишүүн болно.

Гурван түгээмэл саад: - "Энэ урилга өөр имэйл хаяг руу илгээгдсэн байна": ажилтан өөр имэйлээр нэвтэрсэн. Гарч, зөв имэйлээрээ орно, эсвэл та зөв имэйл рүү шинээр урина. - "Таны имэйл хаяг баталгаажаагүй байна": тухайн имэйлээр кодоор нэвтэрч (эсвэл Профайл хэсэгт баталгаажуулж) дахин холбоосыг нээнэ. - "Урилга илгээсэн хүний эрх өөрчлөгдсөн": урьсан хүний эрх буурсан тул шинэ урилга хүснэ.

Нэг хүн олон workspace-д гишүүн байж болно. Гэхдээ эрх нь workspace тус бүрт тусдаа: өөр салбартаа тусад нь урина.

Үндсэн таван эрх бэлэн байдаг, тэдгээрийг засах, устгах боломжгүй.

• Эзэн: бүх эрх. Workspace-д ганц эзэн байна. Эзнийг хасах, эрхийг нь өөрчлөх, сувгийг нь хязгаарлах боломжгүй.
• Удирдагч: баг удирдах, тохиргоо, AI ба мэдлэгийн сан, бараа, захиалга, суваг холбох ба салгах, төлбөр хүлээн авах тохиргоо, маркетинг, тайлан. Мөн эзний workspace-ийн багцыг эзний өмнөөс сунгаж, төлж чадна. Эзэмшил шилжүүлэх эрхгүй. (Эрхүүд хуудасны тайлбарт "Багц, төлбөрөөс бусад" гэж бичигдсэн байж болох ч бодит байдал дээр удирдагч багц сунгаж чадна гэдгийг анхаараарай.)
• Гишүүн: өдөр тутмын ажил. Яриаг бүгдийг харж хариулна, бараа, захиалга, цагийн хуваарь, харилцагчийг засна. AI-ийн тохиргоо, мэдлэгийн сан, flow, коммент дүрэм, маркетингийг зөвхөн харна. Багийн хуудсыг харахгүй.
• Оператор: яриан дээр бүрэн эрхтэй, гэхдээ зөвхөн өөрт оноогдсон болон хэнд ч оноогдоогүй яриаг харна. Харилцагчийг засна, бараа, захиалга, тайланг харна.
• Зочин: бүх хэсгийг харна (яриа ч орно), юу ч өөрчлөхгүй.

Эргэлзвэл бага эрхээр эхэл. Эрхийг дараа нь нэг товшилтоор нэмж болно.

Өөрийн эрх үүсгэхэд зөвшөөрлүүд хэсэг хэсгээр бүлэглэгдсэн байна. Хэсэг бүрт "Харах" ба "Удирдах" (заримд нь "Хариулах", "Холбох", "Салгах", "Илгээх") гэсэн үйлдэл байна.

Дээрх хүснэгтэд гол хэсгүүд бий. Үүнээс гадна: Багц / Төлбөр, Хуудасны тохиргоо, Цагийн хуваарь / Уулзалт, Flow Builder, Comment automation, Постоор борлуулалт, Broadcast, Төлбөр (QPay / Merchant).

Дүрэм: аль нэг хэсгийн удирдах эрх байвал тэр хэсгийг харах эрх дагаж ирнэ. Цэсэнд эрхгүй хэсэг огт харагдахгүй, хуудас доторх эрхгүй товч идэвхгүй харагдана.

1. Тохиргоо, Баг, Эрхүүд (хуудасны гарчиг "Хэрэглэгчийн эрх"). Хоёр таб байна: "Үндсэн эрх" ба "Өөрийн үүсгэсэн эрх". Шинэ эрх үүсгэх дарна.
2. Эрхийн нэр: ажлын үүргээр нь нэрлэнэ ("Борлуулалтын оператор", "Контент менежер"). Эзэн, Удирдагч, Гишүүн, Зочин гэсэн нэрийг ашиглах боломжгүй.
3. Зөвшөөрөл сонгох: хэсэг бүрээс хэрэгтэй үйлдлүүдийг чагтална. Дээд талын хайлтаар "захиалга" гэх мэтээр хайж болно. Мөн Хандалтын хүрээ-г сонгоно.
4. Эрх үүсгэх дарна. Шинэ эрх урилгын болон гишүүний эрх солих сонголтод гарна.

Хязгаар: нэг workspace-д нийт 15 эрх (үндсэн эрхүүдийг оруулаад). Та өөрт байхгүй зөвшөөрлийг шинэ эрхэд оруулж чадахгүй ("Өөрт байхгүй эрхийг олгох боломжгүй").

Эрх устгах: тэр эрхтэй гишүүн байвал устгахын өмнө тэднийг аль эрх рүү шилжүүлэхийг асууна.

Бүх харилцан яриа: Inbox-ийн бүх яриа харагдана.

Зөвхөн өөрт оноогдсон (+ оноогдоогүй): ажилтанд өөрт нь оноогдсон яриа, мөн хараахан хэнд ч оноогдоогүй яриа харагдана. Өөр операторт оноогдсон яриа жагсаалтаас хасагдах ба шууд линкээр ч нээгдэхгүй.

Оноогдоогүй яриа бүх операторт харагддаг нь зориуд: шинэ харилцагч бичихэд аль нэг оператор шууд авч хариулна. Ингэснээр яриа хэнд ч харагдахгүй гацахгүй.

Ийм хүрээтэй ажилтны Inbox-д "Зөвхөн танд оноогдсон яриа" гэсэн тэмдэг гарна.

Хүрээ нь эрхийн тохиргоо: нэг хүнд биш, тэр эрхтэй бүх хүнд үйлчилнэ. Яриа оноох нь Inbox-ийн "Удирдах" эрхтэй хүний ажил.

Эрхийн дэлгэрэнгүй: гишүүний мөрийн гурван цэгтэй цэснээс нээнэ. Тэр хүн юу харж, юу хийж чадахыг гурван хэсгээр харуулна: Эрх (зөвшөөрлүүдийн жагсаалт), Хандалтын хүрээ, Сувгийн хандалт. Ажилтан "би яагаад үүнийг харахгүй байна" гэж асуухад эндээс эхэлж шалгана.

Суваг хязгаарлах: мөн мөрийн цэснээс. "Бүх суваг" эсвэл Messenger, Instagram, Telegram, вэб виджетээс сонгосон сувгууд. Хадгалах дарна. Дор хаяж нэг суваг сонгох ёстой.

Хязгаартай ажилтанд бусад сувгийн яриа жагсаалт, шинэ мессежийн мэдэгдэл, харилцагчийн түүхээс бүгд шүүгдэнэ. Сувгийн хандалт нь хүн тус бүрт тохируулагдана: нэг эрхтэй хоёр оператор өөр өөр сувагтай байж болно.

Сургалтын үеэр өөрийн багийг энэ хүснэгтээр нэг бүрчлэн тохируулаарай.

• Менежер: Удирдагч. Багаа удирдаж, AI-г сургаж, шаардлагатай бол багцыг сунгана.
• Чат оператор: Оператор. Зөвхөн өөрт оноогдсон ба шинэ яриаг харна, бусдын яриатай андуурахгүй.
• Нэг сувгийг хариуцсан оператор: Оператор + Суваг хязгаарлах.
• Захиалга савлагч: Гишүүн нь яриа хариулах эрхтэй. Харилцагчтай чатлах шаардлагагүй бол "Захиалга Удирдах + Бараа Харах" гэсэн өөрийн эрх үүсгэ.
• AI сургагч: Гишүүн эрх AI-г засахгүй (зөвхөн харна). Тиймээс "AI / Knowledge / Catalog: Удирдах" ба "Бараа: Удирдах"-тай өөрийн эрх үүсгэ.
• Нягтлан, хөрөнгө оруулагч: Зочин эрх харилцагчийн яриаг ч харуулдаг. Зөвхөн тоо харах хүнд "Захиалга Харах + Аналитик Харах"-тай өөрийн эрх илүү тохиромжтой.

Нэр нь зохиомол жишээ.

Гишүүний мөрийн цэс, Эзэмшил шилжүүлэх. Энэ товч зөвхөн одоогийн эзэнд харагдана: удирдагч ч шилжүүлж чадахгүй.

Шинэ эзэн нь workspace-ийн идэвхтэй гишүүн, баталгаажсан имэйлтэй байх ёстой.

Цонхонд үр дагавар бичигдсэн байна: - Та эзний эрхээ алдана, буцааж авах товч байхгүй. Буцаахын тулд шинэ эзэн танд эргүүлж шилжүүлэх ёстой. - Та удирдагч (админ) эрхтэй гишүүн болж үлдэнэ: тохиргоо, Inbox хэвээр. - Багц шилжихгүй: багц худалдаж авсан хүнийх хэвээр. Шинэ эзэн хугацаа дуусахад өөрөө сунгана. - Төлбөр хүлээн авах данс (QPay) workspace-ийг дагаж шилжинэ: шинэ эзэн банкны мэдээллээ шалгах ёстой.

"Дээрх үр дагаврыг ойлголоо" чагтлаад Тийм, шилжүүлье дарна.

Эрх солих: хүснэгтийн Эрх баганын сонголтоос шинэ эрх сонгоход "Эрх өөрчлөх үү?" гэж асууна. Өөрийнхөө эрхийг, мөн эзний эрхийг өөрчлөх боломжгүй.

Хасах: мөрийн цэс, Хасах. Тэр хүн тухайн workspace-д хандах эрхээ шууд алдана. Ажлаас гарсан хүнийг тэр өдөрт нь хас.

Үйлдлийн түүх (Баг, Үйлдлийн түүх): багийн удирдлагын үйлдэл бүр бичигдэнэ: урилга илгээсэн, урилга хүлээн авсан, гишүүний эрх солигдсон, гишүүн хасагдсан, эрх үүссэн, шинэчлэгдсэн, устгагдсан. Хэн, хэзээ хийснийг харна. Энэ нь яриа хариулсан, бараа зассан гэх мэт өдөр тутмын ажлыг биш, зөвхөн багийн тохиргооны өөрчлөлтийг бүртгэнэ.

Ажилтан "би харахгүй байна" гэж хэлэх бүрт эхлээд Эрхийн дэлгэрэнгүй-г нээгээрэй: эрх, хүрээ, суваг гурвын аль нь шалтгаан болж байгааг тэндээс шууд харна.

Эзний эрхээр урих, эзнийг хасах, өөрийнхөө эрхийг өөрчлөх боломжгүй нь хамгаалалт, алдаа биш.

Асуулт бүрт эхлээд өөрөө хариулаад, дараа нь хариултыг нээж шалгаарай.

1. Ажилтан бүрт ямар гурван тохиргоо байдаг вэ?

   Эрх (юу хийх), Хандалтын хүрээ (аль яриа), Сувгийн хандалт (аль сувгийн яриа).

2. "Зөвхөн өөрт оноогдсон" хүрээтэй оператор шинэ, хэнд ч оноогдоогүй яриаг харах уу?

   Тийм. Оноогдоогүй яриа бүх операторт харагдана, өөр хүнд оноогдсон нь л нуугдана.

3. Мэдлэгийн санг засах ажилтанд Гишүүн эрх хангалттай юу?

   Үгүй. Гишүүн AI-г зөвхөн хардаг. AI Удирдах эрхтэй өөрийн эрх эсвэл Удирдагч өгнө.

4. Удирдагч эзэмшлийг шилжүүлж чадах уу?

   Үгүй. Зөвхөн одоогийн эзэн шилжүүлнэ.

5. Урилгыг ажилтан ямар имэйлээр хүлээн авах ёстой вэ?

   Урилга илгээсэн, баталгаажсан тэр имэйлээрээ нэвтэрч.

Дараагийн хичээл: Тайлан ба өдрийн тойм, дараа нь Багц ба төлбөр.